عمرو أديب حول أزمة الزمالك : هو النادي بيحكمه قانون ولا ملاهي ومراجيح؟

علّق الإعلامي عمرو أديب، على أزمات الفريق الأول لكرة القدم بنادي الزمالك خلال الفترة الحالية، وأخرها الهزيمة أمام البنك الأهلي في بطولة كأس الرابطة أمس الأحد.

وتعرض الفريق الأول لكرة القدم بنادي الزمالك، لخسارة كبيرة أمام نظيره البنك الأهلي، في مباراة انتهت أمس الأحد، بثلاثة أهداف دون مقابل، ضمن منافسات بطولة كأس الرابطة.

وبهذه الخسارة ودع الفارس الأبيض بطولة كأس الرابطة لموسم 2022/2023، وتلقى الهزيمة الثالثة في كافة البطولات التي ينافس عليها ومنها بطولة الدوري المصري وبطولة دوري أبطال أفريقيا، والأخير كأس الرابطة.

وقال أديب من خلال تصريحات متلفزة : “الزمالك لعب 17 مباراة اتغلب منها في 10، إحنا مش بنتكلم عن فريق، إحنا بنتكلم عن خرابة، 3 أهداف في 7 دقائق إمبارح وده رقم قياسي عالمي جديد”.

وواصل :: “كل يوم فريق الزمالك بينزل التدريب مش عارف مين مدربه.. النهاردة عبد المقصود وبكرة عبد المعبود، معقول تاني أكبر فريق في مصر مش عارف له مدرب؟.. ده شيء مهين وبايخ وشكله وحش، ليه بيتعمل فينا كده.. ليه الزمالك بيتهان؟”.

وأضاف : “فيه طفل صغير نزل الملعب إمبارح والجماهير قالت مش بعيد يجيب الجول الرابع في عواد، اعملوا اللي أنتوا عايزينه في الزمالك بس المشهد ده ميتكررش، حرام اللي بيتعمل في النادي ومقدرش أحمل اللاعيبة مسؤولية الهزيمة، فيه ناس داخل نادي الزمالك مبسوطين بالهزيمة.. فيه مؤامرة في قلب النادي.

وأكمل : “الوضع من سيئ لأسوأ.. الفريق من غير إدارة كسب الدوري مرتين.. كفاية حالة الإنكار دي، رئيس النادي يرجع.. احتمال.. طب هاتوا لجنة تدير الفريق.. لما نشوف، الفريق خارج المنافسة على أي بطولة، والدولة بتتفرج على انهيار النادي، نادي الزمالك إحدى مؤسسات الدولة وضياعه ضياع لأموال الدولة”.

واستهل : “موقف وزير الشباب والرياضة غير واضح، الوزارة خايفة تتخذ أي قرار ممكن يكون فيه نسبة خطأ، النادي مبقاش فيه غير خناقات وخلافات ومؤامرات وخزينة فارغة.. طب وبعدين”.

واتم : “بيعوا النادي وأعملوا مكانه مطاعم وحمامات، هو الزمالك بيحكمه قانون ولا ملاهي ومراجيح؟، طبقوا أي قانون على الزمالك حتى لو قانون المرور بدل الفوضى، أو سيبوه يقع ويبقى خرابة وربنا يتولاه برحمته”.