رويده أشرف تكتب عن مشاكل اتحاد الفروسية وأسباب استبعاد زيادة من أولمبياد باريس

كتبت الزميلة الصحفية رويده أشرف عبر صفحتها على موقع التواصل “فيس بوك” عن مشاركة اتحاد الفروسية في الدورة الأولمبية باريس 2024 والدعم الذي تلقاه الاتحاد وأسباب التعنت ضد الفارس محمد طاهر زيادة والإصرار على عدم مشاركتة في الاولمبياد.

وقالت رويده: كل واحد مذكور اسمه ف البوست ده له حق الرد … سواء لاعب وزير مدير أي شخص… بس قبل ماتفكروا تردوا خليكم عارفين إن كل كلمة مكتوبه هنا ليها مستند معايا وليها دليل وحاجات كتيرة … عشان لما تحبوا تدافعوا عن نفسكم تلفقوا كذبة وحوار يتصدق تمام

تعالوا أحكيلكم قصة وحوارات تلاعب الفروسية قبل الأولمبياد

في البداية كدة كان ف تأهيلات للفرق كانت في شهر إبريل 2023، يعني كان المفروض في فريق كامل يصعد للأولمبياد مكون من 4 أشخاص، 3 منهم يشاركوا أساسي وواحد احتياطي، لكن نائل نصار شارك بحصان ف التصفيات دي ضيع بيه الفريق كله، وحقق نتائج مش كويسة، بالرغم من إن زملائه في الفريق كانوا محققين نتائج كويسة جدا، وللأسف فرصة تأهل فريق ضاعت علينا وراحت للأمارات اللي حققوا نتيجة أفضل من الفريق المصري.

بعدها كان لازم اللاعيبة تشارك في عدد من البطولات للتأهيل الفردي، اللي من شروطها إن مفيش اتنين فردي يتأهلوا للأولمبياد من نفس البلد، ووقتها نائل نصار ومحمد طاهر زيادة تصدروا نتائج تأهيلات الفردي، والتأهيلات دي بتنتهي في ديسمبر 2023، فبيكون في فرق بين نهاية التصفيات دي والأولمبياد حوالي 8 شهور، فالمفروض إن اتحاد الفروسية عند فرصة لحد يوم 8 يوليو إنه يختار الفارس اللي هيمثل مصر في باريس.

بالمناسبة حصان نائل نصار كان بيعرج من شهر أكتوبر 2023.

من يناير لـ يوليو محمد طاهر زيادة كان محقق نتائج أفضل من نائل نصار، ونائل طول الفترة دي مقدرش يحقق أي نتيجة بالحصان اللي المفروض إنه كان هيشارك بيه في الأولمبياد، لأن الحصان قعد فترة طويلة جدا مصاب، الحصان أصلا لم يحقق أي مكسب منذ نوفمبر 2023 حتى يوليو، وده الوقت اللي تم فيه تسجيل نائل بحصانة في الأولمبياد.

 شوف إزاي بقى…. هل الاتحاد واعوانه يسكتوا لا، لازم نلاقي حل علشان نائل يشارك وزيادة لا، طب هنعمل اييييييييييييه؟؟

المهم بقى قالك هنجيب خبير إنجليزي عالمي كبير جدا عشان يختار الفارس اللي هيسافر باريس ويشارك ف الأولمبياد، جابوا الخبير “michael whitaker”، للأسف مايكل ويتكر صدمهم، لأنه اختار محمد طاهر زيادة لتمثيل مصر في الأولمبياد، يسكتوا لا، قالوا للخبير يختار نائل بحصان تاني غير حصانه اللي بيعرج اسمه “ايجور” وده الحصان اللي نائل عمل بيه نتائج في تلت شهور قبل الاولمبياد في الفترة اللي محمد طاهر زيادة كان مصاب فيها في العضلة الضامة وشرخ في انكل رجله ومع ذلك شارك في 3 بطولات وهو مصاب.

 قعدوا يضغطوا على مايكل ويتكر علشان يختار نائل، فقالهم لو نائل نصار مش هيروح الأولمبياد بالحصان السليم اللي محقق نتائج في أخر 3 شهور اللي هو “إيجور”، يبقى محمد طارق زياده اللي هيروح باريس.

المفاجأة بقى، خدوا كلام الخبير ورموه في البحر، وراحوا سجلوا نائل نصار بالحصان اللي بيعرج، اللي اسمه “كونرادو” الذي لم يحقق أي نتيجة هذا العام إطلاقا، والنتيجة اللي حققها الحصان كانت بعد ماتم تسجيله هو ونائل علشان يشاركوا في الأولمبياد.

الخبير مايكل ويتكر نفسه حصل له ذهول وتفاجئ بإن اتحاد الفروسية رمى كلامه في البحر وعمل اللي ف دماغة بس، وسجل نائل بالحصان المصاب.

نيجي بقى لنقطة الدعم، اتحاد الفروسية خد دعم 19 مليون جنية، راحوا فين ياترى؟؟؟

كان في خطاب اتبعت لثلاثة أشخاص وهم نائل نصار و محمد طاهر زيادة و كريم الزغبي، اتقالهم فيه هتاخدوا مرتب شهري قيمته 3000 يورو كل شهر بداية من شهر إبريل ولحد الأولمبياد، علشان احتياجاتكم يافرساااان.

يعمل إيه بقى الاتحاد الذكي و أعضائه العباقرة، يصرفوا 4 شهور لنائل نصار و كريم الزغبي، أه بالمناسبة كريم الزغبي لم يكن مؤهل للأولمبياد أساسا ولم يحقق خلال سنة 2024 إلا نتيجة واحدة فقط، ومع ذلك خد 12 ألف يورو، ده غير إنه أكتر فارس حصل على دعم من الاتحاد، أكتر من نائل نصار و محمد طاهر زيادة.

المصيبة بقى أن محمد طاهر زيادة اللي الخبير قال هو اللي يستحق يمثل مصر ويشارك في الأولمبياد، حصل على مرتب شهر واحد فقط قيمته 3000 يورو، طب الثلاثة شهور الباقيين فين؟؟؟ كلتهم القطة، وقالوا القرار الوزاري اتلغى !!!

اتكتب في القرار الوزاري، إن الاتحاد صرف على شحن حصان نائل نصار اللي بيعرج “2000” يورو، مش بس كده لا ده في “5000” يورو قيمة علف حصان نائل نصار اللي بيعرج بردو.

المشكلة بقى إن لو مثلا حصان نائل نصار ده جاي من دار مسنين وخلاص حالته في الحضيض، ولو بيأكلوه ألماس مش هيوصل قيمة العلف بتاعة لهذا الرقم!!!

كمان نائل نصار عنده شركة راعية أصلا لعلف الحصان والمكملات الغذائية واللبس وكل احتياجات الحصان، طب انتم دفعتوا المبالغ دي لمين ؟؟؟

طبعا عندنا القرار الوزاري له حد أدنى وحد أقصى، المسؤولين عندنا بيحطوا الحد الأقصى في كل حاجة، ماهي الليلة ليلتنا والدفاتر بتاعتنا، والفواتير مفيش صعوبة نجيبها.

طب لازم نسأل نفسنا بردو ماهي حاجة تجنن، كريم الزغبي لم يكن مؤهل للأولمبياد واتصرف عليه وخد أكبر دعم، ليييييييييييه، هقولكم ليه لأن كريم الزغبي كان بيمرن رئيس الأسطبل بتاع الفروسية

طب نسأل نفسنا سؤال تاني ليه التعنت ضد محمد طاهر زيادة وإصرار الوزير واتحاد الفروسية على عدم مشاركتة في الاولمبياد، هقولك عشان عاوز يثبت للناس إن لما زيادة اتمنع عنه الدعم وكل حاجة وشالوا كمان هشام حطب، مقدرش يسافر ويشارك في الأولمبياد، عشان مابيحبش حطب، وهي حرب بقى والخسران شاب عمل كل حاجة وتعب جدا وكان من حقه يشارك في باريس 2024، وهما عملوا كل حاجة علشان يمنعوا محمد طاهر زيادة ويدمروه، علشان مايشاركش في الأولمبياد ولا يحقق نتيجة.

المشكلة بقى إن إسماعيل شاكر رئيس الاتحاد قالك أنا معرفش حاجة عن الدعم اللي خدوه من الوزارة وقيمته 19 مليون جنية.

طب أومال السدود ومصمم الموانع اللي من فرنسا ومدرب الناشئين والمدير الفني الأجنبي للمنتخب اللي جبتهم بعم مامسكت وبعد الوزير ماشال هشام حطب، بتدفعلهم منين ياإسماعيل بيه، وبتدفع بالمصري ولا بالدولار واليورو؟!

الإصابة في الخيل التعود اللي يقعد 4 شهور مصاب، بتبقى في الأغلب إصابة تقضي على الحصان زيها زي إصابة الصليبي في لعيبة الكرة كدة ، وحصان نائل متصاب من شهر فبراير لـ شهر يونيو 4 شهور إصابة أول بطولة شارك فيها كانت في يوليو ومع ذلك الاتحاد صمم يسجل اللاعب بحصانه المصاب، وقرر إنه مش هياخد حتى فارس احتياطي معاهم مع إن قوانين الأولمبياد بتسمح بده، ومع ذلك بكل بجاحة خدوا نائل بحصانه الأعرج وبعثة مكونه من 10 أفراد عشان يروحوا يغيروا جو ويتفسحوا في باريس⁉️

مع إن كان عندهم فرصة يغيروا الحصان ليوم 31 يوليو، بس دول كانوا مصممين على عدم مشاركتنا وإننا مانحققش نتيجة ونصرف ملايين وبس.

طب كل الكوارث دي والمصائب دي مين هيتحاسب عليها⁉️

طب الدعم راح فين ومين استفاد بيه⁉️

طب حق اللاعب محمد طاهر زيادة اللي اتظلم فين⁉️

طب وبعدين ولحد إمتى⁉️⁉️⁉️⁉️