أول تعليق من مرتضى منصور حول أزمة انتقال سيف جعفر لصفوف بيراميدز

تحدث المستشار مرتضى منصور رئيس مجلس إدارة نادي الزمالك، حول أزمة تمرد لاعبي الزمالك والامتناع عن حضور مران الفريق أمس الأحد، بجانب توقيع سيف جعفر لبيراميدز.

وقال المستشار من خلال فيديو عبر يوتيوب: “يا كابتن عبد الواحد اللي مش عايزنا مش عايزينه، أما اللي قالوا اللاعيبة اتمردت النهاردة، اتصورت معاهم، لاعيبة محترمة وتتحمل ظروف النادي، واجتمعت باللاعيبة وقلت لهم البطولة العربية أهم حاجة وبعدين بطولة الكأس، لكن لاعيبة رجالة واستحملت”.

وقال حول أزمة سيف جعفر : “ربنا يوفقك في بيراميدز بس رجع العقود، صفحة سيف جعفر اتقفلت، يلا بقى العب في بيراميدز، سيف مش أغلى من طارق حامد ولا أبو جبل ولا أغلى من اللي مشيوا من الزمالك، مرتضى منصور يمشي مفيش مشكلة، لكن الزمالك أهم مننا كلنا”.

وتابع: كنا فاكرينك محترم وابن النادي، كان عندك 8 سنين وكانوا هيودوك لنادي درجة ثانية إعارة وأنا رفضت، لأنك ابن النادي، أنت لسه في أولى حضانة يا سيف وعايز 12 مليون جنيه، أومال أدي زيزو كام أدي فتوح كام أدي شلبي كام”.

واستهل : “شوف يا ابني مصيرك ومستقبلك، وباب الزمالك اتقفل قدامك مدى الحياة، أبوك بس اللي عضو في النادي، وسأتقدم ببلاغ للنائب العام الأول، إحنا مش عايزينك بس عايزين عقودنا”.

وواصل : “ما حدث من سيف فاروق جعفر استيلاء على المال العام، سيف قالنا أنا وقعت في بيراميدز من شهرين طب جيت تقعد معانا ليه، وقلت لوكيله لو عايز يروح الأهلي مع السلامة”.

وواصل : “سيف خاف يجي الزمالك، وقال مرتضى هيبجبلي فتوات، رغم إن كان معايا أحمد الأحمر والمستشار أحمد جلال، هجيبلك بلطجية ليه”.

وأردف : “جماهير الزمالك حبيت أحطكم في الصورة، وهتشوفوا الفيديو لما سيف جعفر وقع على العقود، وخليكم واقفين ورا جماهيركم مش ورا لاعب، ويا جمهور الزمالك أنت جمهور قوي وشجاع واللي باعك وباع ناديك قوله مع السلامة والقلب دعيلك”.